«Манчестер Сити» вингери Жереми Доку Англия Кубоги ярим финали доирасида «Саутгемптон»га қарши кечган баҳсда (2:1) жамоадоши Нико Гонсалес урган гол уни ҳайратда қолдирганини тан олди.
«Шаҳарликлар» 79-дақиқада гол ўтказиб юборишган эди, бироқ орадан атиги уч дақиқа ўтиб, Докунинг ҳаракатлари эвазига мувозанатни тиклашди. Яна беш дақиқадан сўнг бельгиялик футболчи Никога голли узатма етказиб берди ва у якуний ҳисобни ўрнатди.
«Ростини айтсам, мен ҳайратдаман! Никога энди дарвозага тез-тез зарба бериб туриши кераклигини албатта айтаман. Қандай гол! Қандай гол! Даҳшатли лаҳза», — дея Докунинг интервьюсидан иқтибос келтиради City Report.
Англия Кубогининг иккинчи финалчиси бугун «Челси» ва «Лидс» ўртасидаги учрашувда аниқланади.
