«Барселона»нинг собиқ футболчиси ва мураббийи Хави Эрнандес Лионель Мессининг ноёблиги ҳақида гапириб ўтди. Испаниялик ва аргентиналик юлдузлар 2000-йилларнинг бошидан то 2015 йилгача, яъни ярим ҳимоячи Қатарга йўл олгунига қадар «кўк-анорранглилар» сафида бирга тўп суришган.

«Адашишни хоҳлардим-ку, лекин қачондир янги Мессини кўрамиз деб ўйламайман. Мен у билан 15 йил бирга ўйнадим ва у ҳар томонлама энг зўри эди — техник жиҳатдан, жисмоний ҳолат ва ўйинни тушуниш борасида унга тенг келадигани йўқ эди. У ҳатто бош билан ҳам яхши зарба берарди, ўнг оёғида ҳам ажойиб ўйнарди. Руҳий жиҳатдан ҳам у ҳақиқий «махлуқ» (монстр) эди — енгилмас, феноменал инсон. У билан бирга ўйнаш бошқаларга қараганда анча осон эди. Сиз шунчаки тўпни унга узатасиз ва у ҳаммасини энг яхши тарзда амалга оширишини биласиз. Унинг ёнида ҳамма яхшироқ кўринарди», — деди Хави. Унинг сўзларини Barca Universal нашри келтирмоқда.

Лионель Месси «Барселона»ни 2021 йилда тарк этган эди. 2023 йилнинг ёзидан буён ҳужумчи «Интер Майами» шарафини ҳимоя қилмоқда.