«Барселона» клуби айни дамда ижара асосида «Жирона» шарафини ҳимоя қилаётган дарвозабон Марк-Андре тер Штегеннинг хизматларига эҳтиёж сезмаяпти. Бу ҳақда таниқли журналист Фернандо Поло хабар бермоқда.

Манбанинг маълум қилишича, ёзги трансфер ойнасида 33 ёшли посбон учун энг мақбул вариант яна бошқа клубга ижарага берилиши бўлиб турибди. Ҳозирча бирор-бир жамоа уни тўлиқ сотиб олиш таваккалига қўл уриши амримаҳол бўлиб кўринмоқда.

Эслатиб ўтамиз, «Жирона» тер Штегенни шу йилнинг январь ойида ижарага олган эди. Бироқ у янги жамоасида бор-йўғи 2 та ўйинда майдонга тушиб, ўз дарвозасидан 2 та тўп олиб чиқди ва яна жароҳат олди. Германиялик дарвозабоннинг «Барселона» билан амалдаги шартномаси 2028 йилнинг ёзига қадар мўлжалланган.