«Бавария» ярим ҳимоячиси Йозуа Киммих Чемпионлар лигаси ярим финали доирасида «ПСЖ»га қарши кечган илк ўйинда (4:5) мюнхенликлар дарвозасига белгиланган пенальти ҳақида ўз фикрини билдирди.

Биринчи бўлим якунида бош ҳакам Сандро Шерер видеотакрорни кўргач, «Бавария» ҳимоячиси Альфонсо Дэвиснинг қўл билан ўйнагани сабабли нуқтага ишора қилган эди.

«Мен қўл билан ўйин учун берилган пенальти такрорини кўрмадим, лекин бу кўпроқ тасодифан содир бўлди. Бу шунчаки футбол руҳиятига тўғри келмайди. Саккиз ёки тўққиз йил олдин Мадридда ўйнаганимизда, мен ҳам худди шундай пенальти берилишини хоҳлаган бўлардим.

Бу ҳақиқатан ҳам одамнинг ғазабини келтиради, чунки ўша вазиятда узатмани голга айлантириши мумкин бўлган бирорта ҳам рақиб ўйинчиси йўқ эди. Менимча, жарима майдончаси ичидаги ҳар қандай қўл билан ўйин пенальтига олиб келмаслиги учун қоидага ўзгартириш киритиш керак. Тўп унинг тиззасидан қўлига тегди, бунинг учун берилган жазо эса Чемпионлар лигаси ярим финалида ҳал қилувчи аҳамиятга эга», — деди Киммих.