«Сарагоса» дарвозабони Эстебан Андрада Сегунда учрашувидаги агрессив хулқ-атвори учун жазоланди.

Эслатиб ўтамиз, «Уэска»га қарши кечган баҳснинг 97-дақиқасида Андрада мезбонлар ҳимоячиси Хорхе Пулидони итариб юборган эди. Ҳакам аргентиналик посбонга иккинчи сариқ карточкани кўрсатгач, у «Уэска» сардорига яқинлашиб, уни мушт билан уриб йиқитди. Зарба натижасида испаниялик футболчининг юзи шишиб кетган ва кўз остида кўкариш пайдо бўлган.

Пулидога қилинган ҳужумдан сўнг дарҳол оммавий муштлашув бошланиб кетди. Натижада «Уэска» дарвозабони Даниэль Хименес ва «Сарагоса» ҳимоячиси Дани Тасенде ҳам майдондан четлатилди.

Испания Қироллик футбол федерацияси (RFEF) Тартиб-интизом қўмитаси Андрадани рақибга ҳужум қилгани учун 12 та ўйинга, иккита сариқ карточка (қизил) учун эса яна битта ўйинга дисквалификация қилиш ҳақида қарор чиқарди.

Муштлашувда иштирок этган Хименес 4 та ўйинга, Тасенде эса 2 та ўйинга четлаштирилди.