“Манчестер Юнайтед” сардори Бруну Фернандеш ўтган ёзда Саудия Арабистонидан келган кўп миллионли шартномани рад этганининг сабабини очиқлади. Маълум бўлишича, футболчининг бу қарорида рафиқаси Ана Пиньонинг ўрни катта бўлган.

Ўтган мавсумдаги омадсизликлардан сўнг, “қизил иблислар” таркибни қайта қуришни режалаштирган, бу эса жамоа етакчиларидан бирининг сотилишини ҳам истисно этмасди. Шу паллада Саудиянинг “Ал-Ҳилол” клубидан молиявий жиҳатдан ўта манфаатли таклиф тушади.

Фернандеш оиласининг келажагини таъминлаш мақсадида ушбу вариантни жиддий кўриб чиққан. Бироқ рафиқасининг биргина саволи ҳаммасини ўзгартириб юборган:

“Сен футболчилик фаолиятингдаги барча орзуларингга эришиб бўлдингми?”

Бу савол Брунуни ўз келажаги ҳақида ўйлашга мажбур қилди. Клуб афсонаси Уэйн Руни билан суҳбатда португалиялик ярим ҳимоячи ҳали ҳам “Манчестер Юнайтед” билан Премьер Лига ва Чемпионлар Лигасида ғолиб чиқишни исташини тан олди.

Натижада Фернандеш пуллардан кўра спорт амбицияларини устун қўйиб, “Олд Траффорд”да қолишга қарор қилди. У жорий мавсумда ўзининг энг яхши ўйинларини кўрсатмоқда ва жамоанинг асосий етакчиларидан бири ҳисобланади.