Машҳур собиқ футболчи, ҳозирда агент сифатида фаолият юритаётган Хавьер Пасторе ўзининг мижози Франко Мастантуононинг «Реал Мадрид»даги келажаги ҳақида фикр билдирди.

18 ёшли аргентиналик вингер Европа футболидаги дебют мавсумини ўтказмоқда. Дастлабки ўйинларда «қаймоқранглилар»нинг асосий таркибида мунтазам майдонга тушган бўлса-да, сўнгги ойларда Мастантуоно ҳатто захирадан тушишда ҳам қийинчиликларга дуч келмоқда.

«У ҳали бор-йўғи 18 ёшда. Мен ҳам ўз вақтида 18 ёшимда «Реал»да бўлишни истардим! Франко — ўта истеъдодли футболчи, айнан шунинг учун ҳам у шундай буюк клубга қабул қилинган. Унга мослашиш учун вақт бериш керак. Шунингдек, жамоадошлари ҳам унинг ўз ўйинини топиб олишига кўмаклашишлари лозим.

Франко Мбаппе ёки Винисиус каби ўйин тақдирини якка тартибда ҳал қиладиган футболчилар тоифасидан эмас. У кўпроқ жамоавий ўйинга таянади ва шериклари билан ҳамжиҳатлик у учун жуда муҳим. Ўйлайманки, вақт ўтиши билан биз ҳақиқий Мастантуонини кўрамиз», — дея Пасторенинг сўзларини келтирмоқда Diario AS.

Маълумот учун, ёш футболчининг Мадрид клуби билан амалдаги шартномаси 2031 йилга қадар мўлжалланган.