«Манчестер Юнайтед» бош мураббийи Майкл Кэррик Чемпионлар лигасининг ярим финали доирасида бўлиб ўтган «ПСЖ» ҳамда «Бавария» (5:4) ўртасидаги учрашув ҳақида ўз фикрларини билдириб ўтди. Ўтган сешанба куни Парижда ўтган баҳсда жамоалар бир-бирига жами тўққизта гол уришди. Жавоб учрашуви 6 май куни Мюнхенда бўлиб ўтади.
«Албатта, биз ҳам мана шундай Чемпионлар лигаси оқшомларининг бир қисми бўлишни, турнирнинг ҳал қилувчи босқичларигача етиб боришни истаймиз. Менга илгари бундай лаҳзаларни бошдан кечириш насиб этган. Ҳар доим ўзингни энг юқори даражада синаб кўришни хоҳлайсан. Ҳа, биз айнан шу мақсад сари интиляпмиз», – дея жавоб берди Кэррик Париж мезбонлик қилган ўйин ҳақидаги саволга.
«МЮ» Чемпионлар лигасига қайтишни деярли нақд қилиб қўйган. Якшанба куни «қизил иблислар» Премьер-лиганинг 35-тури доирасида ўз майдонларида «Ливерпуль»ни қабул қилишади.
