Лондоннинг «Арсенал» клуби бош мураббийи Микель Артета ҳужумчи Виктор Дьёкереш ва вингер Букайо Саканинг майдондаги ҳамкорлиги ҳақида ўз фикрларини билдирди. Швециялик ва инглиз футболчилари Премьер-лига доирасида шанба куни «Фулхэм»га қарши кечган баҳс қаҳрамонларига айланишди: биринчиси дубль қайд этиб, битта голли узатмани амалга оширган бўлса, иккинчиси ўз ҳисобига биттадан гол ва ассист ёздириб қўйди.

Учрашув «тўпчилар»нинг 3:0 ҳисобидаги ишончли ғалабаси билан якунланди.

«Дьёкереш ва Сака дуэти? Афсуски, жароҳатлар сабабли улар биргаликда у қадар кўп ўйнашмади, лекин уларда ўзаро тушуниш даражаси юқори. Бугунги ўйинда уларнинг ҳамкорлиги менга жуда манзур бўлди», — деди Артета журналистлар билан суҳбатда.

5 май куни «Арсенал» Чемпионлар лигаси финалига чиқиши мумкин — бунинг учун ўз майдонида Мадриднинг «Атлетико» жамоасини ярим финал жавоб баҳсида мағлуб этиши лозим (биринчи ўйин — 1:1).