«Барселона» ҳужумчиси Ферран Торрес Ла Лига доирасида Мадриднинг «Реал» клубига қарши бўлиб ўтадиган бўлажак ўйин борасидаги кутилмалари билан ўртоқлашди. Якшанба кунги «эль-класико»даги ғалаба ёки дуранг «кўк-анорранглилар»ни финишга уч тур қолганда чемпионга айлантиради.
«Якшанба куни ҳар қандай воқеа содир бўлиши мумкин. Нима бўлганда ҳам, «Реал»да жуда кучли футболчилар бор. Аммо ҳаммаси ўзимизга боғлиқ: ўйинни қандай назорат қилишимиз ва баҳсни қандай бошлашимизга. Менимча, биз уч очкони қўлга киритамиз ва чемпион бўламиз. Менга бир неча бор «эль-класико»ларда иштирок этиш насиб қилган, бироқ бўлажак учрашув ўзига хос бўлади», — дея Торреснинг сўзларини келтиради Barca Universal.
Учрашув Тошкент вақти билан 10 майдан 11 майга ўтар кечаси соат 00:00'да бошланади.
