«Манчестер Юнайтед» ярим ҳимоячиси Каземиро фаолиятини қайси клубда давом эттириши борасида кутилмаган қарорга келди. Журналист Сэм Лакхерстнинг хабар беришича, 34 ёшли бразилиялик футболчи кейинги манзилини танлаш ҳуқуқини рафиқасига берган.
Манбага кўра, футболчи шу тариқа рафиқасига «Реал Мадрид» ва «Манчестер Юнайтед»даги фаолияти давомида кўрсатган кўп йиллик қўллаб-қувватлови учун миннатдорчилик билдирмоқчи.
Каземиро 2022 йилдан буён инглиз клуби шарафини ҳимоя қилиб келмоқда. Ушбу давр мобайнида у барча мусобақаларда 159 та ўйинда майдонга тушиб, 26 та гол ва 14 та голли узатмага муаллифлик қилди. Унинг «қизил иблислар» билан амалдаги шартномаси 2026 йилнинг июнь ойи якунига қадар мўлжалланган. Transfermarkt портали тажрибали хавбекнинг трансфер баҳосини 8 миллион еврога баҳоламоқда.
