«Манчестер Сити» бош мураббийи Хосеп Гвардиола жамоа ҳимоячиси Матеус Нунеснинг ўйинидаги ўсишни юқори баҳолади. Испаниялик мутахассис асли ярим ҳимоячи бўлган португалиялик футболчини мудофаанинг ўнг қанотига ўтказган эди ва эндиликда ушбу қарор ўз самарасини бермоқда.

Гвардиоланинг фикрича, Нунес янги позициясида дунёнинг энг яхшиларидан бирига айланган.

«Бу унинг ўз устида ишлаши натижасидир. Унда барча жисмоний маълумотлар бор: ярим ҳимоячи каби пас беради ва айни пайтда юқори тезликка эга. Матеус ўзининг тактик интеллекти билан мени ҳайрон қолдирди. У олдинга қадам ташлади ва мақтовларга лойиқ. Унга тор доирада ўйнаш ноқулай бўлиши мумкин, лекин бўш ҳудудларда жуда фойдали», — дея Гвардиоланинг сўзларини келтирмоқда City Xtra.

Эслатиб ўтамиз, ўтган шанба куни АПЛ доирасида «Брентфорд»га қарши кечган баҳсда (3:0) Нунес тўлиқ ҳаракат қилиб, «шаҳарликлар»нинг ғалабасига ўз ҳиссасини қўшган эди.