Франция терма жамоаси собиқ ярим ҳимоячиси Эммануэль Пети Килиан Мбаппенинг "Арсенал"га ўтиш эҳтимоли ҳақида ўз фикрларини билдирди.
"Арсенал" Мбаппенинг келишидан мамнун бўларди, у чап қанот ҳужуми учун идеал номзод. Менимча, Мбаппенинг "Реал"да қолишига ягона сабаб — унинг бирор бир соврин ютмасдан жамоани тарк этиши муваффақиятсизлик деб баҳоланишидир. Килианнинг хоҳиш-истаклари жуда юқори, шунинг учун у клубда қолиб, аксини исботлашга ҳаракат қилади. Бунга деярли аминман. Агар унинг ўрнига бошқалар қарор қабул қилмаса, у дунёнинг энг катта клубини шунчаки тарк этмайди", — деди Пети.
Шунингдек, собиқ футболчи трансфер фақат Флорентино Перес босимга бардош бера олмаган тақдирдагина амалга ошиши мумкинлигини таъкидлади.
"Миллионлаб мухлислар Килианнинг кетишини талаб қилиб петиция имзолашди. Бу Мбаппе учун якун бўлиши мумкин, чунки Перес — сиёсатчи. Агар "Арсенал" илк бор Чемпионлар лигасида ғолиб чиқса, бу клуб тарихини ўзгартиради ва трансфер бозорида кучли сигнал бўлади", — дея қўшимча қилди Эммануэль Пети.
