«Челси» ҳужумчиси Жоао Педро Лондон клубидаги позицияси ва майдондаги роли борасидаги фикрлари билан ўртоқлашди.

Бразилиялик футболчи TNT Sports ва Lance нашрларига берган интервьюсида ҳужум марказида ўйнаш истагини яшириб ўтирмади.

«Челси»га ўтган вақтимдан бери бу ҳақда кўп гапирганман — мен фақат «тўққизлик» позициясида ўйнашни истайман. Позициянгни доимий равишда ўзгартираверганингда, берилган ролни ҳис қилиш қобилиятини йўқотар экансан. Дарвозага яқинроқ, соф ҳужумчи ролида ўйнаш менга кўпроқ мос келади. Бироқ мен жарима майдончаси ичида шунчаки тўп кутиб турадиган ҳужумчи эмасман, балки ўйин жараёнида фаол иштирок этишни ёқтираман», — дейди Педро.

Маълумот учун, Жоао Педро жорий мавсумда «Челси» либосида барча турнирларда 48 та учрашувда майдонга тушиб, 20 та гол ва 9 та голли узатмага муаллифлик қилди. Унинг Лондон клуби билан амалдаги шартномаси 2033 йилнинг 30 июнига қадар имзоланган.