Англия терма жамоасининг собиқ сардори Дэвид Бекхэм бойлиги 1 миллиард фунт стерлинглик довондан ошган биринчи британиялик спортчига айланди. Бу ҳақда «Sunday Times» нашри хабар бермоқда.
Бекхэм ва унинг рафиқасининг умумий бойлиги 1,185 миллиард фунт (1,36 миллиард евро) деб баҳоланмоқда. Спорт дунёси вакиллари орасида ушбу оила фақат «Формула-1» собиқ раҳбари Берни Экклстоун оиласидан (тахминан 2 миллиард фунт) кейин иккинчи ўринни эгаллаб турибди.
Футболчилик фаолиятини якунлаганидан сўнг, Бекхэм бизнес лойиҳаларини фаол ривожлантирди. Ҳозирги вақтда у МЛСнинг энг қиммат франшизаси ҳисобланган ва 1 миллиард фунтдан зиёдга баҳоланадиган «Интер Майами» клубининг ҳаммуассисидир. Бундан ташқари, собиқ футболчи Adidas ва Hugo Boss каби йирик жаҳон брендлари билан ҳамкорлик қилиб келмоқда. Оилавий капиталнинг салмоқли қисми илгари «Spice Girls» гуруҳи иштирокчиси сифатида машҳур бўлган Виктория Бекхэмнинг мода бренди билан ҳам боғлиқ.
