«Реал» ярим ҳимоячиси Федерико Вальверде ижтимоий тармоқларда Даниэль Карвахаль билан хайрлашди. Бугун мадридликлар 34 ёшли ҳимоячи жорий мавсум якунида клубни тарк этишини эълон қилишган эди. Карвахаль — клуб тарбияланувчиси ва жамоа сардори ҳисобланади.
«Дани, сенинг бу клубдаги тарихинг худди эртакка ўхшайди. Болаларнинг жуда ками улғайганидан кейин ҳам ўзларини тарбиялаган жамоага бўлган чексиз муҳаббат билан, бутун умр бир хил либосни фидокорона ҳимоя қила олади.
Мен буни аввал ҳам айтганман ва доим шу фикрда қоламан: «Мадрид»да бўлиш — ҳаммага ҳам насиб этавермайдиган имтиёздир» ва сен бу имтиёзнинг энг идеал намунасисан. Академиядаги болалар ўрнак олиши керак бўлган намуна.
Узоқ вақт давомидаги бу кураш, садоқат ва эҳтирос. Футболни бундай ҳис қилиш, либосга бўлган бундай муҳаббат… Шундай туйғулар бор экан, ҳеч нарса нотўғри кетиши мумкин эмас.
Бу абадий хайрлашув эмас. Бу шунчаки «кўришгунча», чунки дўстлар клубдан ташқарида ҳам ҳамиша бўлганидек кўришиб туришади. Бу хайрлашув эмас, чунки сен бу клубда улкан мерос, ўчмас из қолдирмоқдасан. Бу шундай таъсир ва муваффақиятларки, улардан ўзиб кетиш жуда қийин бўлади.
Бу хайрлашув эмас, чунки сен «Реал»нинг энг буюк тарихи бир қисмига айланасан. Чунки менинг фарзандларим ва «Реал»нинг бўлажак мухлислари Дани Карвахаль ким бўлганини яхши билишади. Биз сени яхши кўрамиз», — деб ёзди Вальверде.
