Лиссабоннинг «Спортинг» клуби ярим ҳимоячиси Мортен Юльманн яна Мадриднинг «Атлетико» клуби қизиқишлари доирасига тушиб қолди.
Mundo Deportivo нашрининг хабарига кўра, «матрасчилар» раҳбарияти ёзги трансфер ойнасида майдон марказини бир йўла иккита футболчи билан кучайтиришни мақсад қилган. Энг асосий номзодлардан бири сифатида ўтган қишдаёқ клуб эътиборини тортган Юльманн қолмоқда.
Маълумотларга кўра, ўшанда мадридликлар даниялик хавбек учун 25 миллион евро таклиф қилишган, бироқ «Спортинг» бу таклифни рад этган эди. Шу билан бирга, футболчи ва Португалия клуби ўртасида оғзаки келишув мавжуд бўлиб, унга кўра, шартномада 80 миллион евролик товон пули кўрсатилганига қарамай, Юльманн 40 миллиондан 50 миллион еврогача бўлган суммага жамоани тарк этиши мумкин.
Юльманннинг «Спортинг» билан амалдаги шартномаси 2028 йилнинг ёзига қадар мўлжалланган.
