Дарвозабон Ян Облак мадриднинг «Атлетико» клубидаги келажаги борасида тарқалган миш-мишларга изоҳ берди. Испания гранди сафида 12 мавсумни ўтказган словениялик дарвозабон ҳали ҳеч нарса аниқ эмаслигини тан олди.

«Ростини айтсам, нима бўлишини билмайман. Бунга мен катта таъсир ўтказа олмайман. Миш-мишлар қизиқлигини биламан, аммо мен ўйинга диққатимни қаратганман. Мен доимо шартномамни ҳурмат қилганман ва бундан кейин ҳам шундай қиламан. Мен ҳали қўлга киритмаган совринларни ютмоқчиман, аммо охирги сўз клубга тегишли», — дейди дарвозабон «Nogomania» нашрига берган интервьюсида.

«Қарорни клуб қабул қилади. Ўзимга келсак, ўзимни ажойиб ҳис қиляпман ва яна бир неча йил давомида энг юқори савияда ўйнай олишимга ишончим комил», — дея якунлади Облак.

Эслатиб ўтамиз, Облак «матрасчилар» билан жами 4 та соврин, жумладан, Испания чемпионати ва Европа Лигаси кубогини қўлга киритган.