«Антверпен» собиқ ҳимоячиси Тоби Алдервейрелд Бельгия клубининг назорат пакети акцияларини сотиб олувчи консорциум таркибига кирди.

«Андерлехт»нинг собиқ президенти Вутер Ванденхауте бошчилигидаги инвесторлар гуруҳи «Антверпен»нинг амалдаги эгаси Пол Гейссенс билан принципиал келишувга эришди. Қиймати ўнлаб миллион еврони ташкил этувчи ушбу келишув яқин кунларда узил-кесил расмийлаштирилиши режалаштирилган.

«Янги консорциумимизга қўшилган антверпенлик тадбиркорларга миннатдорчилик билдирмоқчимиз. Уларнинг масъулияти ва клубга бўлган муҳаббати бизни қаттиқ таъсирлантирди. Биз биргаликда «Антверпен»нинг келажаги учун жавобгарликни ўз зиммамизга олишга тайёрмиз», — дейилади Алдервейрелд ва Ванденхаутенинг қўшма баёнотида.

HLN берган маълумотларга кўра, келишувнинг амалга ошишига Бельгия бош вазири Барт де Вевер ҳам ҳисса қўшган ва у Ethias суғурта компанияси билан музокараларда иштирок этган. Клуб бош директори Свен Жак ўз лавозимини сақлаб қолади ва у ҳам «Антверпен» акциядорига айланади.

Ўтган мавсумда «Антверпен» Бельгия мунтазам чемпионатида еттинчи ўринни эгаллади ва чемпионлик гуруҳига кира олмади. Еврокубокларга йўлланма берувчи плей-офф босқичида эса жамоа олтита клуб ичида бешинчи бўлди ва халқаро турнирлар йўлланмасисиз қолди.