Охирги 4 ўйинида 10та гол уриб, барчасида ғалаба қозониб келаётган "Манчестер Юнайтед" янги йилни мағлубият билан бошлади. Дэвид Мойес шогирдлари Boxing Day`нинг сўнгги ўйинини ўз майдонларида ўтказиб, "Тоттенҳэм"га имкониятни бой беришди.
Устунлик "МЮ"да бўлиб турган 34 дақиқада кутилмаганда меҳмонлар ҳисобни очишди. Қанотдан узатилган тўпни Адебайор боши билан де Хеа дарвозаси бурчагига жойлаб қўйди - 0:1. Биринчи бўлимда бошқа гол урилмади.
Иккинчи тайм ўрталарида икки дақиқа ичида "Олд Траффорд" иккита голнинг шоҳиди бўлди. Дастлаб "МЮ" жарима майдонида юзага келган кичик рикошетдан сўнг Эриксен ҳисобдаги фарқни иккита оширган бўлса, кўп ўтмай Уэлбек бу фарқни яна биттага қайтариб қўйди.
"МЮ" декабр ойини ҳам ўта муваффақиятсиз бошлаганди. Ўшанда жамоа дастлаб сафарда дуранг ўйнаб, кейинги икки ўйинни ўз майдонида ўтказиб, бирорта очко ололмаганди.
Манчестер Юнайтед – Тоттенҳэм 1:2
Голлар: 0:1 – 34 Адебайор, 0:2 – 66 Эриксен, 1:2 – 67 Уэлбек.
Манчестер Юнайтед – Де Хеа, Смоллинг (Кагава, 61), Видич, Дж. Эванс, Эвра, Кэррик (Х. Эрнандес, 61), Клеверли (Эшли Янг, 84), Валенсия, Руни, Янузай, Уэлбек.
Тоттенҳэм – Льорис, Уокер, М. Доусон, Кирикеш, Роуз, Капу (Бенталеб, 64), Дембеле, Леннон, Эриксен, Адебайор (Шадли, 70), Сольдадо (Кейн, 75).
Огоҳлантиришлар: Руни (41), Дембеле (80), Янузай (89).
