"Манчестер Сити" футболчиси Яя Туренинг агенти Дмитрий Селюкнинг таъкидлашича, ярим ҳимоячи жамоадошлари ва клуб раҳбариятининг ҳурматсизлигидан жаҳли чиққан. Жамоанинг Абу-Дабида бўлиб ўтган чемпионликни нишонлаш маросимида жамоа раҳбариятидан ҳеч ким Турени туғилган куни билан табрикламаган.

"Яя шунчалик ғазабга миндики, у ҳаттоки бошқа жамоага ўтиш борасида ўйлай бошлади. "Сити" унга нисбатан ҳурматсизлик қилди. Гап янги шартнома ёки маош ҳақида эмас, шунчаки инсоний муносабатларда. У маоши камайиши эвазига бўлса ҳам "Барселона"га кетишга тайёр. Бўлиб ўтган воқеа шуни кўрсатмоқдаки, клуб унга тупуриб қўйган. Эсдан чиқаришган бўлиши мумкин? Яя ҳақида-я? Жамоанинг икки марта мамлакат чемпиони бўлишига, мамлакат кубоги ва Лига кубогини қўлга киритишда катта ҳисса қўшган футболчини-я? 11 май куни "шаҳарликлар" чемпионликни қўлга киритишди ва 13 май куни Туренинг туғилган куни бўлди. Барча хурсандчилик қилди, аммо ҳеч ким уни табрикламади ва унга яхши тилаклар билдирмади", - дейди Селюк.

Бундан бир йил аввал ҳам Туре клуб раҳбариятини ўзига нисбатан ҳурматсизлик билан муносабатда бўлаётганини таъкидлаганди. Лекин орадан 1 ой ўтиб Яя жамоа билан шартномасини 2017 йилга қадар узайтирганди. 31 ёшли Туре 2010 йилдан бери "Сити"да ўйнаб келмоқда. Ушбу мавсумда эса 20та гол билан Премьер-лига тўпурарлари орасида 3-ўринни эгаллади.