Хабарингиз бор, эртага Европанинг бир қатор шахарларида ЕЧЛ гуруҳ босқичи 4-тур учрашувлари бўлиб ўтади. Турнинг марказий учрашувларидан бири Мадридда ўтказилади ва унда "Реал Мадрид" клуби Ангилиянинг "Ливерпуль" клубини қабул қилади. Шу муносабат билан бугун бўлиб ўтган матбуот анжуманида қироллик клуби бош мураббийи Карло Анчелотти эртанги ўйин хавида ўз фикрларини билдириб ўтди.

"Айни пайтда биз ажойиб ўйин намойиш этаётганимиз ҳақиқат ва биз хар бир ўйин қанчалик муҳим эканини яхши биламиз. Ҳар бир ўйин биз учун ҳам синов, ҳам имконият. Лекин биз ҳеч нарсадан қўрқмаймиз, чунки бизда профессионал жамоа бор. Тан олишга мажбурман, биз ўтган мавсум ҳам айнан ҳозирги ўйин услубида ўйнашга ҳаракат қилдик. Мен бу жамоага ишонаман", — деди италиялик мутахассис.

Шунингдек, мураббий жароҳатланган футболчилар ҳақида ҳам гапириб ўтди.
"Бэйлнинг ахволи анча яхши. Коэнтрау, Хесе ва Карвахал эртанги ўйинни ўтказиб юборишади. Ильяраменди ҳамда Хедира ҳам эртанги ўйинга тайёр эмаслар, лекин Бэйлда ҳаммаси яхши. У эртанги ўйиннинг дастлабки дақиқаларидан майдонда тушади".

Карло Анчелотти Роналду ва бошқа футболчилар ҳақида ҳам гапириб ўтди.
"Роналду жамоавий ўйинчи. У барча эьтиборини жамоага қаратган, рекордларни янгилашга эмас. Роналду ҳақида янги сўз топиш қийин. У шунчаки фантастик ўйинчи. Иско ҳам яхши ўйнамоқда. У профессионал ва ажойиб техника соҳиби, шунинг учун ҳар бир мухлис Исконинг ўйинини томоша қилишни хоҳлайди".