Кеча Жанубий Кореянинг «Yonhap News» ахборот агентлигига интервью бераркан, «Сеонгнам» бош мураббийи Ким Хак Бом клубда икки мавсум тўп сурган Ўзбекистон терма жамоаси сардори Сервер Жепаровнинг жамоани тарк этганлигини расман тасдиқлади.

«Ўтган мавсум сафимизда бўлган Сервер Жепаров ва бразилиялик Валдивия клубимизни тарк этди. Клубимиз бюджети катта эмаслигидан хабарингиз бор. Шунинг учун ўтган мавсумдаги таркибга ишонч билдирган ҳолда 1-2 нафар янги футболчиларни олиб келиш режам бор. Ҳозир Бразилия ва Шарқий Европадан футболчи излаш билан бандмиз. Кичикроқ суммага савияли легионер топиш осон эмас экан», деди Кореяда Сер Алекс Фергюсонга қиёсан «Хак Бомсон» деган лақабни олган Ким Хак Бом.

«Сеонгнам» якунига етган мавсумда кей-лигада аранг жон сақлаб қолган бўлса-да, Корея футбол ассоцияцияси Кубогини қўлга киритганлиги туфайли кейинги мавсумда ОЧЛда иштирок этади. Ўтган ҳафта жамоа президенти Ли Же Мёнг янги мавсумда футболчиларнинг маошлари ва мукофот пулларини оширишга ваъда берганлиги хабар қилинмоқда. Жумладан, клуб президенти янги мавсумда клубга 7 миллиард вон (тахминан 6 миллион 350 минг АҚШ доллари) миқдорида сармоя киритиш режасини маълум қилди. Шунингдек, ОЧЛда муносиб қатнашиш мақсадида янги футболчилар хариди учун 1,5 миллиард вон (тахминан 1 миллион 360 минг АҚШ доллари) миқдорида пул ажратиш режалаштирилган.

Отабек Йўлдошев
Жанубий Корея, Сеул