«Барселона» ҳужумчиси Лионель Месси яна бир можарога ўралашиб қолиши мумкин.

ABC хабарига кўра, футболчи болаларга ёрдам жамғармасини очиб, у орқали 10 млн евро маблағни яширишга муваффақ бўлган.

Манбанинг маълумотига кўра, 2007 йилда очилган жамғарма ўз даромадларининг катта қисмини ҳисоботларга киритмаган. Катта эҳтимол билан, бу жамғарма Месси ва унинг оиласи даромадларини яширишга хизмат қилган.

Жамғарма 2007 йили Испанияда жамоат ташкилоти сифатида рўйхатдан ўтган. 2009 йилда эса Аргентинанинг Мессига қадрдон бўлмиш Росарио шаҳрида ўз ваколатхонасини очган. Месси ва унинг отаси турли хил шартномаларга имзо чеккан. Аммо бу ҳақда тегишли идораларга ҳеч қандай ҳисобот берилмаган. Натижада, уч йил давомида ҳисобот бермагани учун Аргентина молия вазирлиги ташкилотни ўз рўйхатидан ўчириб юборган.

ABC фикрига кўра, Мессининг жамғармаси хайрия ишлари билан шуғулланмасдан, даромадларни яширишга уринган.