«Манчестер Юнайтед» бош мураббийи Жозе Моуриньо Европа чемпионлар лигаси доирасида ЦСКАга қарши бўлиб ўтган ўйин (4:1) борасида ўз фикрларини билдириб ўтди.

– Бугунги учрашув – «МЮ»нинг ҳозирги пайтдаги энг яхши ўйиними?
– Албатта, ўйинни бундай бошлашимизни кутмагандим. Биз жуда кучли бошладик: дастлабки 4та зарбанинг 3тасини голга айлантирдик. Бундай ажойиб стартдан кейин хотиржамликни сақлаб қолиб, ўйинни ғалабагача олиб боришимиз керак эди.

– Ўйиндан аввал хотиржамликни сақлаб қолиш ҳақида гапиргандингиз. Бундай ажойиб ўйиндан кейин буни уддалаш қийин бўлса керак?
– Бундай ғалаба жамоанинг умумий ҳолатига ҳам, баъзи футболчиларнинг ҳолатига ҳам ижобий таъсир кўрсатади. Жумладан, Эррерага. У етарли ўйин амалиётига эга бўлмаяпти, аммо бугун зўр ўйнади. Бу гапни Марсьял ҳақида ҳам айтиш мумкин. Шанба куни бўладиган АПЛ баҳсига сидқидилдан тайёргарлик кўрамиз.

– Марсьялнинг ўйинига қандай баҳо берасиз?
– Сафарда қўлга киритилган ғалабадан хурсандман. «МЮ» сўнгги марта ЕЧЛда иштирок этганида, жамоа бундай натижани қўлга кирита олмаганди, айниқса, сафар баҳсларида. Ўтган мавсумда биз ЕЧЛда иштирок этмадик. Биз мусобақага қайтдик ва ажойиб натижаларни қайд этяпмиз. Баҳснинг 60-дақиқасига қадар барча яхши ўйнади. Ҳисоб 4:0га етганидан кейин ўйинчи алмаштиришларни амалга оширдим ва ўйинни якунига етказиб қўйдик. Шу билан бирга, ҳеч ким жароҳат билан боғлиқ муаммоларимизни ҳеч ким гапирмаяпти. Марказий ўқимиз кучсизланиб қолган. Лекин майдонга тушаётган футболчилар жуда яхши ўйнашмоқда.

– Лукаку октябрь ойига қадар 10та гол урди.
– Бу ҳайратланарли натижа, лекин футболни ҳужумчининг ўзи ўйнамайди. Лукакунинг атрофида ажойиб жамоа йиғилган. Сентябрь ойида яна битта ўйинимиз қолди. Бу ойда у яхши ўйин кўрсатди. Умид қиламан, бундай натижалар унга салбий таъсир кўрсатмайди ҳамда у ишлашда ва гол уришда давом этади.