Лондоннинг "Арсенал" жамоаси бош мураббийи Арсен Венгер АПЛнинг 11-тури доирасида "Манчестер Сити"га қарши бўлиб ўтган ўйиндан (1:3) кейин ўйин ҳақида ўз фикрдари билан ўртоқлашди ва ҳакамлар ишидан кўнгли тўлмаганини таъкидлади.

"Интенсив ўйин бўлди, ҳар иккала жамоа ажойиб ҳаракат қилди. Рақиб дарвозаси олдида кўп голли вазиятлар яратдик. Якунда ҳакам бизнинг зараримизга қарорлар қабул қилди: шубҳали пенальти ва офсайддан урилган гол. Бунга йўл қўйиб бўлмайди. 

Ҳакамлар ўз устиларида яхши ишлашмаяпти. Уларнинг савияси йилдан-йилга тушиб кетмоқда. 

Назаримда, тезкор футбол намойиш қиладиган жамоага қарши яхши ҳаракат қилдик. Балки, биринчи бўлимда "Арсенал" ҳимояга кўпроқ ётиб олгандир. Танаффусдан кейин кўпроқ ўйинда бўлдик. Натижа 1:2 бўлиб турганида ҳисобни тенглаштиримиз мумкин эди.

"Манчестер Сити" – яхши жамоа. Лекин унинг қанчалар кучлилигини бошқалар гапирсин", – деди Венгер.

Эслатиб ўтамиз, "Манчестер Сити" - "Арсенал" ўйинини Майкл Оливер бошчилигидаги ҳакамлар бошқариб боришди.