«Реал»нинг Ла лиганинг 16-тури доирасида «Райо Вальекано»га қарши уй ўйинига 55.229 нафар мухлис ташриф буюрди. Умуман олганда, ушбу мавсумда "Сантьяго Бернабеу"га мухлисларнинг ташрифи камайиб бормоқда. Нега бундай бўлаётганини ушбу мақола орқали аниқлашга ҳаракат қиламиз.

1994 йилдан бери «Реал»нинг уй ўйинларига бу қадар кам мухлис келмаганди. "Қироллик клуби" 2018 йилда "Бернабеу"да ўтказган ўйинларининг 63 фоизида ғалаба қозонган бўлса, 37% баҳсда 3 очкони қўлга кирита олмаган.

2018 йилда «Реал Мадрид» «Бернабеу»да жами 27та ўйин ўтказиб, уларнинг 17тасида ғалаба қозонди, 5тасида дуранг ўйнади («Нумансия»,«Атлетик», «Бавария» ва икки марта «Атлетико» билан) ва 5 марта ютқазди («Вильярреал», «Леганес», «Ювентус», «Леванте» ва ЦСКАга). Бундан ташқари, баъзи ўйинларда ғалаба қўлга киритилган бўлса-да, жамоанинг ўйини анча нурсиз чиқди. Мана шу ҳолат ҳам мухлисларнинг камайишига сабаб бўлди.

24 йил аввал эса "Мадрид" мана шундай паст натижа кўрсатганди: ўшанда "Сантьяго Бернабеу"даги учрашувларнинг 42 фоизида жамоа ғалаба қозонмаганди. Ўшандан бери "қаймоқранглилар" бундай оғир мавсумга дуч келишмаганди.


Рақамлар
Мадридликларнинг сўнгги 3та уй ўйинида мухлислар сони 56.000дан ошмади.
– Испания кубоги, жавоб ўйини: "Мелилья" (6:1) – 55 243;

– ЕЧЛ, гуруҳ босқичи, 6-тур. ЦСКА (0:3) – 51 636;

– Ла лига, 16-тур. "Райо Вальекано" (1:0) – 55 229.

Ўтган мавсумнинг бошидан декабрь ойи ўртасигача бўлган даврда "Бернабеу"да 12та ўйин ўтказилган бўлиб, битта учрашувга ўртача 68 297 мухлис келганди. Ушбу мавсумда эса ўртача ташриф 8%га камайган: 62 788 ишқибоз.

Ўтган мавсум билан таққослашда давом этадиган бўлсак, Ла лига доирасидаги баҳсларга ташриф ўртача 5000 мухлисга камайган бўлса, ЕЧЛдаги пасайиш нақ 11 минг мухлисни ташкил қилди.

Сабаблар
"Қироллик клуби" мухлисларининг стадионга ташрифи камайиши клуб натижаларининг салбий кўриниш олганидан ташқари, яна бир нечта сабабларни келтириб ўтишимиз мумкин:

— Криштиану Роналду "Реал"ни тарк этди;

— Мавсумий абонементлар нархи 10%га оширилди;

— Мавсум стартидаги салбий натижалар;

— Мураббийларнинг ўзгариши;

— Жамоага юлдуз футболчининг олиб келинмагани...