Англиянинг «Лестер» клуби бош мураббийи Брендан Роджерс «Челси» клубига қарши (2:2) бўлиб ўтган учрашувдан кейинги фикрлари билан ўртоқлашди.
«Қайд этилган натижадан қониқмадик, сабаби, бугун ғалаба қозонишни жуда хоҳлаган эдик. Ўйлашимча, ҳар икки бўлимнинг бошида жуда секин ҳаракат қилдик. Иккинчи голни киритганимиздан кейин ғалаба қозонишимиз шарт эди. Рақибга икки гол совға қилишимиз керак эмасди. Бугун «Лестер» эътиборсизлик ҳисобига икки очко йўқотди.
Баъзилар топ клубларга қарши учрашувдаги дуранг натижани яхши деб аташади. Лекин бугунги учрашувда биз кўпроғига лойиқ эдик. Бизнинг ёш жамоамиз кўп нарсаларни ўрганишда давом этмоқда. Вақт ўтиши билан биз албатта ўсишга эришамиз», — деди Брендан Роджерс.
