Туриннинг «Ювентус» клуби футболчиси Пауло Дибалага Мадриднинг «Реал» клуби жиддий қизиқиш билдирмоқда дея хабар бермоқда Sport Mediaset.

Манбанинг ёзишича, «Қироллик клуби» футболчи борасида «Ювентус»га йирик таклиф юбормоқчи. Хабарда айтилишича, «қаймоқранглилар» Дибала учун 100 миллион евродан кўпроқ маблағ сарфлаш ниятида. «Бланкослар» ушбу битимни амалга ошириш учун Иско ёки Тони Кроосни қўшиб беришга тайёр.

«Реал» ҳали бу таклифни «Ювентус»га юбормади, лекин, «Қироллик клуби» Дибалани сотиб олиш иштиёқи кучли. Шу билан бирга «Ювентус» аргентиналик футболчи борасида тушадиган таклифларни кўриб чиқмоқчи эмас. Бундан ташқари, "Юве" Дибала билан янги шартнома борасида келишувга эришган.

Дибаланинг ўзи ҳам «Ювентус»ни тарк этиш ниятида эмас.