Испания Ла Лигасининг 6-туридан ўрин олган бир қатор баҳслар 22 сентябрь, чоршанба куни ўтказилди.

Мадриднинг «Реал» клуби ўз уйида «Мальорка»ни қабул қилди. Учрашувнинг 3-дақиқасидаёқ Карим Бензема рақиб ҳимоясидаги хатодан кейин ҳисобни очди. 24-дақиқада Марко Асенсио собиқ жамоаси дарвозасини ишғол қилди. Бунга меҳмонлар дарҳол Ли Кан Иннинг голи билан жавоб қайтарди. 29-дақиқада Асенсио ўзининг иккинчи, жамоасининг эса учинчи голини урди.

Иккинчи бўлимда мадридликлар яна уч бор меҳмонлар дарвозасини аниқ нишонга олди. Асенсио ва Бензема ўз ҳисобига яна биттадан гол ёздириб қўйган бўлса, захирадан тушган Иско ҳам майдонни голсиз тарк этмади.

Ушбу ғалабадан кейин «Реал» очколарини 16 тага етказиб олган ҳолда биринчи ўринга қайтди ва энг яқин таъқибчиси «Атлетико»ни 2 очкога ортда қолдирмоқда.

Ла лига, 6-тур
22 сентябрь, чоршанба
«Реал Мадрид» — «Мальорка» 6:1
Голлар: 1:0 – 3 Бензема, 2:0 – 24 Асенсио, 2:1 – 25 Ли Кан Ин, 3:1 – 29 Асенсио, 4:1 – 55 Асенсио, 5:1 – 78 Бензема, 6:1 – 84 Иско.
«Реал Мадрид»: Куртуа, Начо (Сантос, 80), Алаба, Милитао, Мигел Гутеррес, Вальверде, Камавинга (Антонио Бланко, 60), Бензема (Йович, 80), Асенсио (Иско, 72), Винисиус Жуниор, Родриго (Васкес, 72).
«Мальорка»: Рейна, Састре, Валент, Гайя (Коста, 59), Оливан, Батталя, Фебас (Санчес, 59), Кубо (Баба, 46), Ли Кан Ин, Лаго Жуниор (Хорди Мбоула, 76), Ҳопп (Прац, 59).
Огоҳлантиришлар: Родриго (47), Баба (57), Начо (67).