"Ювентус" "Рома" қанот ҳужумчиси Николо Дзаньолони ўз сафига қўшиб олишга ҳаракат қилишда давом этмоқда, дея хабар беради журналист Николо Скира.
"Кекса сеньора" раҳбарияти 22 ёшли футболчининг агенти билан 3 та учрашув ўтказди. Италиялик футболчига "Милан" ҳам қизиқиш билдирмоқда, аммо айнан "Ювентус" Дзаньоло учун биринчи рақамли даъвогар саналади.
Тахминларга кўра, италияликнинг трансфери "бўрилар"га 55 миллион еврога яқин даромад келтириши мумкин.
Николо ўтган мавсумда "Рома" сафида барча турнирларда 42 ўйинда 8 гол урди ва 9 голга ассистентлик қилди. Унинг Рим клуби билан шартномаси 2024 йилнинг 30 июнига қадар тузилган.
