Чоршанба оқшомида “Лейпциг” Германия чемпионати доирасидаги уй учрашувини “Фрайбург”га қарши ўтказди. Марко Розе шогирдлари рақибини 3:1 ҳисобида мағлуб этишди. Шу билан бирга, “буқалар” биринчи бўлимда Йошко Гвардиолни бой беришди – хорватиялик ҳимоячи 23-дақиқада алмаштирилди.
"Лейпциг" матбуот хизматининг хабарига кўра, текширув натижасида Гвардиолнинг бурни синганлиги аниқланган. Ҳимоячига жарроҳлик аралашуви талаб қилинмайди. Унинг Қатардаги жаҳон чемпионатига иштироки хавф остида эмас.
“Лейпциг” айни дамда Германия Бундеслигаси турнир жадвалида 5-ўринни эгаллаб турибди.
Жаҳон чемпионати 20 ноябрь куни бошланади.
