«Лестер» ҳамда «Эвертон» ушбу қарама-қаршиликка катта қўрқув билан ташриф буюради. Чунки ҳар иккала жамоа ҳам пастки лигага тушиб кетиш хавфи остида бўлиб турибди. Айнан қуйи лигага тушиб кетувчи клублар тахмин қилинганда «Эвертон» иккинчи (73,9%), «Лестер» эса 5-ўринда тилга олинган.
«Лестер»
«Тулкилар» сешанба куни Жейми Вардининг сўнгги дақиқаларда урган голи эвазига «Лидс»дан очко олишга муваффақ бўлган эди. Ундан битта олдинги баҳсда эса «Вулвз» 2:1 ҳисобида таслим этилган. Унгача эса жамоа кетма-кет нақ 9 та ўйинда ғалаба нималигини билмади - 1 дуранг, 8 та мағлубият. Жамо яқинда тайинланган Дин Смит қўл остида 3 та ўйинда 4 очко жамғарди. Ушбу мураббий «Эвертон»га қарши анча яхши статистикага эга. У «ирисчи»ларга қарши 6 та баҳсда мағлуб бўлмаган ва 4 та ўйинда ғалаба қозонган. Бу борада фақатгина Антонио Конте (7) Смитдан яхшироқ натижага эга.
Бу ўйинни «Лестер» учун ҳаёт-мамот жанггига қиёслаш мумкин. Чунки шундан сўнг жамоа жадвалнинг биринчи ярмидаги 3 клубга қарши майдонга тушади - «Фулхем», «Ливерпул», «Нюкасл». Сўнг эса «Вест Хем»га қарши баҳс кутиб турибди.
«Эвертон»
Клуб учун жорий мавсум росмана катастрофага айланиб кетди. «Ирисчилар» сўнгги бор 1950-51 йилларда қуйи лигага тушиб кетган. Шон Дайч жамоаси АПЛнинг сўнгги турида «Ньюкасл»га 1:4 ҳисобида енгилди. Бу уларнинг ғалабасиз серияларини 6 та ўйинга узайтирди. «Эвертон» сўннги 10 та учрашувнинг атиги биттасида ғалаба қозонган холос (4 дуранг, 5 мағлубият). Бироқ ушбу хавфли зоналар «Эвертон» учун янгилик эмас. Жамоа ўтган мавсум ҳам майнинг бошида 18-ўринда эди. Бироқ ўшанда вазият ўз вақтида ўнгланган. Келгуси турларда Дайч шогирдлари «Брайтон» ҳамда «Ман Сити»га тўқнаш келишини ҳисобга олсак, бу галги турда очко олиниши шарт. Ундан кейинги икки баҳс «Вулвз» ҳам «Борнмут»га қарши бўлиб ўтади.
Жамоаларнинг сўнгги баҳси
У 2022 йилнинг 5 ноябрида содир бўлган ва «тулкилар» 2:0 ҳисобидаги ғалабани тантана қилган эди. Ўшанда «Эвертон»га Лэмпард, «Лестер»га эса Рожерс устозлик қиларди. Ливерпулдаги оқшомда Тилеманс ҳамда Барнс катта саҳнага чиққан.
Ҳозирги формаси
Ҳар иккала жамоа мос равишда 18 ҳамда 19-ўринлардан жой олган. «Лестер» сўнгги 18 баҳснинг барчасида гол ўтказиб юборган. Бу клубнинг яқин йиллар ичидаги АПЛ тарихидаги энг узун серияси ҳисобланади. Бунгача 1994 йил апрель-декабрь ойларида 21 та баҳсда кетма-кет гол ўтказиб юборилган.
«Эвертон» сўнгги 12 та сафар ўйинида ғалаба нималигини билмай келмоқда. 2021 йил августда «Брайтон»ни меҳмонда 2:0 ҳисобида ютганларидан бери 33 та баҳснинг атиги 2 тасида ғалаба қозонган холос. Бу орада 3 та «клин-шит» қайд этилган ва ҳар уччала ҳисоб ҳам 0:0 ҳисобида тугаган.
