Германиялик собиқ ярим ҳимоячи Бастиан Швайнштайгер немис футболидаги инқироз сабаблари ҳақида гапирди.
“Бу Германия терма жамоаси ва умуман немис футболи учун жуда қийин вазият. Менимча, жуда кўп ўзгаришлар бўлди. Биласизми, Гвардиола мамлакатга келиб, “Бавария”ни бошқарганида, ҳамма унинг футболини ўйнашимиз кераклигига ишонганди – қисқа паслар ва шу кабилар.
Биз қадриятларимизни йўқотдик. Ўйлайманки, кўпчилик бошқа давлатлар Германияни жангчи, ўйин охиригача курашишга тайёр жамоа сифатида кўрган эди. Биз ўтган 7-8 йил ичида кучли томонларимизни унутиб қўйдик. Биз бир-биримизга чиройли паслар етказишга кўпроқ эътибор қаратяпмиз, бу инқироз сабабларидан бири", - дея Швайнштайгернинг сўзларини келтиради TalkSport.
Гвардиола 2013 йилдан 2016 йилгача "Бавария"ни бошқарган. Унинг қўл остида мюнхенликлар уч марта Германия чемпиони бўлди ва уч марта Германия кубогини қўлга киритди.
