"Ливерпуль"нинг ҳалок бўлган футболчиси Диогу Жотани дафн этиш маросими бўлиб ўтди.

"Ливерпуль" ва Португалия терма жамоаси форварди, шунингдек, унинг Португалия иккинчи лигаси вакили "Пенафиэл" сафида тўп тепган укаси Андре Тейшейра да Силва Испаниядаги ЙТҲда ҳалок бўлди. Маълум қилинишича, Жотанинг автомобили ёрилиб кетган шина туфайли йўлдан чиқиб кетган ва ёниб кетган.

Бугун футболчиларнинг дафн маросими ўз она шаҳри Гондомар шаҳрида бўлиб ўтди. Хотира маросими бир соатча давом этди.

Дафн маросимида футболчиларнинг оила аъзолари, дўстлари, шунингдек, уларнинг жамоадошлари ва мураббийлари иштирок этди.

Дафн маросимида футболчилардан Виржил ван Дейк, Эндрю Робертсон, Жордан Хендерсон, Фабиньо, Тиаго Алькантара, Руй Патрисиу, Бернарду Силва, Бруно Фернандеш, Жоау Феликс, Жозе Фонте, Ренату Вейга, Рикардо ва Андре Орта ва бошқалар бор эди.

Жоау Канселу ва Рубен Невеш клублар ўртасидаги жаҳон чемпионатида "Ал-Ҳилол"нинг "Флуминенсе"га мағлубиятидан сўнг дарҳол АҚШдан учиб келишди. Жотанинг укаси тўп тепган Португалиянинг иккинчи лигаси вакили "Пенафиэл" футболчилари тўлиқ таркибда етиб келишди.

Дафн маросимида мураббийлар ва функционерлардан Арне Слот, Фернанду Сантуш, Нуну Эшпириту Санту, Роберто Мартинес, Андре Виллаш-Боаш бор эди.

Ван Дейк хотира маросимида Жотанинг 20-рақамли гулчамбарини, Робертсон эса Силванинг 30-рақамли гулчамбарини олиб борди.

Маросимдан сўнг Жотанинг тобутини кўтарганлардан бири унинг яқин дўсти Невеш эди.