Кириш Регистрация
20/11 01:00 Боливия 2-2 Парагвай
20/11 04:00 Колумбия 0-1 Эквадор
20/11 05:00 Аргентина 1-0 Перу
20/11 05:00 Чили 4-2 Венесуэла
20/11 05:45 Бразилия 1-1 Уругвай
21/11 18:00 Пахтакор - ОКМК
22/11 16:00 Нефтчи - Насаф
22/11 18:15 Қизилқум - Навбаҳор

Блог

Сафарали Сиддиқов

Футбол — спорт қироли!

Нимчорак финал охирги манзил бўлмасин

Баҳо:
+0; -0

Ёшлар ўртасидаги жаҳон чемпионатида ўйнаётган терма жамоамиз нимчорак финал баҳсларига қатнашиш ҳуқуқига эга бўлди. Олдинги баҳсларни кўнгилдагидек ўтказа олмаган жамоамиз учун бу натижа бир қараганда бахтли тасодифдай кўринмоқда.

Дарҳақиқат, Гондурас терма жамоасига қарши ўйиндаги бесўнакай ҳисоб, "немис машинаси"дан учралган йирик ҳисобдаги мағлубиятдан сўнг кўпчилик йигитларимизни аэропортга кузатиб ҳам қўйишди. Аммо омадни қарангки, биз гуруҳдан иккинчи ўринни олиб, кейинги босқичга чиқиб турибмиз. Бунинг учун биринчи навбатда Гондурас ва Фижини биздан кўра йирикроқ ҳисобда енгган Германия ҳамда Гондурасни сенсацион тарзда мағлуб этган Фижига раҳмат айтмоғимиз лозим. Ҳар қандай ҳолатда бизнинг гуруҳда намойиш этган ўйинимизни ижобий деб бўлмайди.

Шу ўринда мухлисларга ҳам айтадиган гапим бор. Ўзбекистон ёшлари Германияга ютқазгандан кейин stadion.uz, uff.uz каби сайтларга кириб, мақолалар остидаги фикрларни кузатдим. Энди, шу десангиз, футболимиз, жамоаларимиз тўғрисида шундай ёмон сўзларни айтишаяптики... На кулишингни биласан, на ачинишингни. Энг аввало, инсоннинг кимлигини эса биринчи навбатда унинг сўзлаган сўзи белгилайди. Жамоамиз тўғрисида эса...

Биз қуръа ташлангандан кейин жуда хурсанд бўлгандик, бизга осон гуруҳ тушди деб. Сал бўлмаса, ана шу "кучсиз" гуруҳнинг энг кучсиз жамоаси ўзимиз бўлиб қолардик. Яхшиям бахтимизга Фижи бор экан. Гондурасни бир амаллаб ютиб берди. Нимчорак финалга ҳам эсон-омон етиб олдик. Энди биз мухлислар нима қиламиз? Кечагина футболчиларимизни бисотимиздаги бор ёмон сўзлар билан, киноя ва кесатиқлар билан ҳақоратлаб ётгандик. Энди бугун мақтаймиз-а? Ҳақиқий мухлис севимли жамоасининг оғир кунида ҳам, енгил кунида ҳам бирга бўлмоғи керак.

Футболчиларимиз нимчорак финалда Австрия ёшларига қарши майдонга тушишади. Улардан сўрайдиган илтимосимиз, мана шу юртнинг, Ўзбекистоннинг асл ўғлонлари эканликларини ҳис этиб майдонда тўп тепишсин, ўзбек миллати довруғини дунёга танитишсин. Юракда ватанпарварлик ҳисси жўш уриб турса ҳар қандай рақибни ҳам тиз чўктирса бўлади. Биз нимчорак финалга чиқдик. Аммо 2 йил муқаддам Туркияда ўтган ёшлар ўртасидаги жаҳон чемпионатида бундан ҳам яхши натижани қайд этган эдик.
Ўшанда Уругвай ва Франциядан 0:4 ҳисобида мағлуб бўлган жамоамизнинг чорак финалгача етиб боргани кўпчиликнинг ёдига ҳам келмайди.

Дарвоқе, ёшлар ва ўсмирлар ўртасидаги жаҳон чемпионати ҳақида. Одатда, бу каби турнирлар янги-янги истеъдодларни кашф этиш, мамлакат миллий терма жамоасига маҳоратли чарм тўп усталарини етказиб бериш учун ташкил этилади. Ахир ҳамма ҳам бирданига буюк футболчи бўлиб колмайди-ку, шундай эмасми? Миржалол Қосимов 1987 йилда Иттифоқ ўсмирлар терма жамоаси билан жаҳон чемпиони бўлди. Кейинчалик, ўзбек футболи юлдузларидан бири сифатида юртимиз футболи тарихида ўз ўрнини топди.
Тақдирни қарангки, унинг ўғли Миржамол Қосимов 2015 йилги ёшлар ўртасидаги жаҳон чемпионатида юртимиз шарафини ҳимоя қилмоқда. Италиядаги ота-ўғил Чезаре ва Паоло Мальдинилар бажарган ишни уддалаш ўзбекистонлик Қосимовлар сулоласига насиб этармикан? Ёинки Саудия Арабистони терма жамоаси 1989 йилда ўсмирлар ўртасида жаҳон чемпиони бўлди. Улар мана бу Бразилия, бу эса Аргентина деб довдираб ўтирмадилар. Жамоавий ўйин, бир ёқадан бош чиқариш эвазига ҳеч кимнинг етти ухлаб тушига кирмаган натижани қайд этиб қайтдилар. Кейин бу жамоа улғайиб, АКШда ўтган ЖЧ-1994да иштирок этди. Голландия, Бельгия ва Марокаш каби кучли терма жамоалар билан бир гуруҳдан жой олган араблар рақибларга етарлича ташвиш туғдирдилар.
Гуруҳдан иккинчи ўринни олиб нимчорак финалга чиқдилар. Жамоа ҳужумчиси Саид ал- Овайраннинг Бельгия дарвозасига киритган голи мусобақанинг энг чиройли голи деб топилди. Жамоа дарвозабони Муҳаммад ал-Деайя мундиалнинг энг яхши дарвозабонларидан бири сифатида эътироф этилди. Мана сизга болалар футболига бўлган юксак эътиборнинг самараси.

Бизда эса...
Бизда ҳам болалар футболига бўлган эътибор ёмон эмас. Аммо-лекин ёшлар мундиалида иштирок этиб қайтган футболчилар кейинчалик улғайгач изсиз йўқолиб кетмоқда. Бунга сабаб нима? Шахсан ўзим яқин ўтмишда футболимизда етишиб чиққан Илёс Зейтуллаев, Марат Бикмаев, Вагиз Галиулин, Даврон Мирзаев каби номлардан кўп нарса кутгандим. Афсуски, ҳозир уларнинг қаердалигини ҳам билмаймиз. 2009 йилда Аҳмад Убайдуллаев қўлостида мини-мундиалда иштирок жамоа бутунлигича кўринмай кетди деса ҳам бўлади. Масалан, ўша жамоада ҳам иктидорли футболчилар талайгина эди. 2013 йилдаги ЖЧда ёшларимиз етакчиси сафатида каралган Аббос Махситалиев нимага шу пайтгача миллий термамиз сафидан муқим жой эгаллай олмади. Қисқаси, биз иштирок этаётган ёшлар ва ўсмирлар ўртасидаги жаҳон чемпионатларининг футболимизга деярли фойдаси тегмаяпти. 2015 йилда ҳам мана гуруҳ босқичдан бир амаллаб ўтиб олдик. Балки анча кучли рақиб бўлган Австриядан ҳам ўтармиз. Лекин бу йигитлар эртага катта футболда ўз ўрнини топиб кетадими, йўқми, буни Худо билади.

Сафарали СИДДИҚОВ

Киритилган сана: 09.06.2015 18:06. Ўкилди: 9721 марта.

Фикр билдиринг

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

МУАЛЛИФНИНГ БОШҚА МАҚОЛАЛАРИ

 

БЛОГГЕРЛАР

Асосий сахифа
© STADION.UZ
Гувоҳнома №0917. Берилган санаси: 02.12.2013. Муассис: «OSIYO KABEL» МЧЖ. Бош муҳаррир: Бўронов Олимхўжа Азимхўжа ўғли. Таҳририят манзили: 100057, Тошкент шаҳри, Уста Ширин 125. E-mail: admin@stadion.uz
Барча ҳуқуқлар ҳимояланган. Сайт материалларидан тўлиқ ёки қисман фойдаланилганда веб-сайт манзили кўрсатилиши шарт.
Блогдаги материаллар учун блог эгаси, хабарлар остидаги фикрлар учун фойдаланувчининг ўзи жавобгар.