Кириш Регистрация
01/04 00:00 Мальорка - Осасуна

Блог

Қаҳрамон Асланов

25-кадр

"Челси тажрибаси"

Баҳо:
+1; -0

Яқинда машҳур “Форрест Гамп” фильми ҳақидаги бир мулоҳазани ўқиб қолдим. Ибратли жиҳат. Инсон табиати гуёки, оқимга қарши сузишга ўхшайди. Гуёки бутун олам бизнинг эхтиёж ва орзуларимиз йўлидаги тўсиқлардек, унга қарши сузишга, ёриб чиқиб кетишга ҳаракат қиламиз. “Яшаш учун кураш” деб номлаймиз, ўзимизча. Инсон ўз тақдирини ўз қўллари билан яратади, деб шиорлар танлаймиз ўзимизга. Аммо биздан талаб қилинадиган вазифа шунчаки, ўзимизни тақдир хукмига ташлаганча, хукм бизни умрнинг қайси бурчагига етаклаб бормасин, фақатгина ҳар бир нуқтада инсон бўлиб қолишгина эканлигини тушунсак, қолганини ўзига ҳавола қилсак, ҳаммаси яхши бўлишини кам ўйлаймиз. Ўша фильм давомида майин шабада билан учиб юрган оппоқ пат ҳам, аслида мана шу фалсафани тарғиб этса, не ажаб?

Европа футболида “ПСЖ”, “Манчестер Сити”, “Малага”, “Анжи” каби клублар пайдо бўлаётган ва озми-кўзми бу ҳаракатлар ўз мевасини бераётган бир пайтда “Челси”нинг ЕЧЛ даги ғалабаси жуда керак эди. Йўқ, кўпчилик “Челчи”ни юқорида санаб ўтилган жамоалар билан бир қаторда кўрса-да, мен бундай деб ҳисобламайман, аксинча, айнан бугунги “Челси”нинг кечаги ғалабаси мана шундай проектларга қарши ўзига хос зарба бўлди.

Ҳа, бир пайтлар “Челси” ҳам шу йўлдан борган. Тўққиз йил олдин бу клуб чексиз маблағга эга бўлган ва керакли натижа учун ҳеч қандай сарфдан қайтмайдиган катта бир аждарҳони эслатгани бор гап. Лекин жамоа брэндини яратиш устидаги ишлар, “Челси” атрофидаги пиар компания шу даражада усталик билан барқарор ишладики, бугун биз “Челси”ни гуёки, юз йиллардан бери ўша “Юнайтед” билан чемпионлик талашиб юрган буюк клуб сифатида қабул қиламиз негадир. Балки сиз учун парадоксал янграр, аммо ЕЧЛ йўлидаги “Бавария”нинг йўли юқоридаги “пули кўплар”га намуна сифатида бўлиши ва футбол йўналишини айнан ўша “Сити”лар тарафга буриб юбориши мумкин эди. Йўқ, яна тушунтира олмадим, “Бавария” зинҳор “Сити”га ўхшамайди. Гап бошқа ёқда.

“Бавария” ёки “Реал” Европа чемпионлар лигасини ютиш учун керакли бўлган барча ишларни амалга оширишди. Узоқ вақт шаклланган таркиб, тажрибали тренер, халқаро тажриба, мақсад ва амбиция, ҳамма ҳаммаси ушбу совринни ютиб олишга қаратилганди. Ҳатто “Бавария” финал ўйинини ўз майдонида ўтказиши ҳам яна битта муҳим фактор эди. Бу жамоаларнинг оқибатда мақсадга эришишлари биласизми, ЕЧЛ ғолиби бўлишнинг формуласини пайдо қилган бўларди. Сиз ҳам ЕЧЛ ғолиби бўлмоқчимисиз, марҳамат, мана шу жамоалар қилган ишни қилинг, сарфланг, тайёрланинг, ва сизга ҳам омад кулиб боқади! Ёқадими?

Мен финал куни “Челси”га мухлислик қилдим. Буни яширмайман. Сабаби, айнан “Челси”нинг ғалабаси эртакнамо романтикани тақдим этди бизга. Футболнинг маъносини ўша моддиёт-у менежментлардан юқорига кўтарди. Абрамович илгари ҳаракат қилмаганмиди ЕЧЛ га? Йўғ-е бу йўлда ундан ортиқ ҳаракат қилган йўқки, биз ҳар йили ЕЧЛ финалини Абрамовичга ачиниш билан ҳам тугатар эдик. Кечаги ғалаба айнан ўша ҳаракатларнинг маҳсули экани, “Челси” ғалабасида ўша “Бавария”да мавжуд моддий пойдевор мавжуд экани ҳақидаги гаплар сафсата. Хўш, “Челси”нинг ғалабасида формула борми? “Челси”ни йўлини такрорлай оласизми? Кимдир энди, ЕЧЛ ни ютмоқчи бўлса, “Челси”нинг йўлидан юра оладими?

Йўқ, азизлар. “Челси”нинг йўлидан юриш учун кимматбаҳо мураббий олиб келиш керак. Кейин жанжал чиқиши, у ҳайдалиши, мураббий сифатида ҳеч ким танимайдиган “бири” келиши, “Наполи”га тўртта гол уриш, АПЛ ни бой бериш, финалнинг 84-дақиқасида гол ўтказиб юбориб, кейин жавоб қайтариш керак. “Челси”нинг йўлидан юриш учун финалнинг қўшимча дақиқаларида пенальтини қайтариш керак. “Челси”нинг йўлидан юриш учун “Барселона” майдонида ягона имкониятдан гол уриш керак. Шунақасини эплаш осонми? Кўряпсизми, жамоанинг ғалабагача босиб ўтган йўли ҳеч қайси таҳлил ва мантиқ билан ифодаланмайди. “Челси” кубок учун офисда, тактика тахтасида, трансфер бозорида юрмади. “Челси” кубокни фақат ва фақат футбол майдонида ютди. Фақат футбол майдонида. Тўп думалоқ, майдон текис. Кимдир шу йўлдан яна юра оладими? Йўқ! Бу жуда хатарли. Бунинг учун Месси пенальтини ура олмаслиги керак. Бунинг учун “Наполи” мавсумдаги энг ёмон ўйинини ўтказиши керак. Бунинг учун тарихда серияда ютқазмаган (!) немисларда (!!!) пенальти тепа оладиган мард топилмай қолиши керак. Бунинг учун Мюнхендаги ҳар бир бурчак тўпини голга айлантириш керак. Хўш, юрасизми бу йўлдан?

Моуриньо қанчалик мақтанмасин, 2004 йилда у барпо қилган “Порту”ни ҳам ғалабага етаклаб келган асосий омил футбол майдони эди. Ўша "Порту" да ҳам ЕЧЛ ғолиби бўлиш учун барча шароит буткул амалга ошириб қўйилмаганди. Ўша ғалаба ҳам менежмент ва мураббийликнинг чўққиси эмасди. Футбол майдонида мантиқ йўқ. Футбол майдонида воқеалар ривожи, кетма-кетлиги бор. Мана шу кема кетлиқ оқибатда “Порту”ни шоҳсупага олиб чиққан эди.

Ҳамма гап шунда. Биз “Челси”нинг Европа Чемпионлар лигасига ҳақли экани, йиллар давомидаги тажриба, ниҳоят уларнинг ҳам ғолиб чиқишга ҳақ қозонганликлари ҳақида гапирмоқдамиз. Аммо Абрамович бу йўлда миллиард доллар сарфлаб қўйгани учун эмас, айнан “Челси”нинг майдондаги ўйинлари туфайли бу тасаввурга эга бўляпмиз, тўғрими? Бир пайтлар Москвада йиқилиб тушган Терри, ғалати Эвребе, “Ливерпуль” билан ярим финаллар... “Челси” ушбу соврин йўлида яратган пойдевор ҳам, унинг ушбу мавсумда босиб ўтган йўли ҳам – бу соф футбол! Футболда эса формула йўқ, акс ҳолда оддий ғилдиракдан энг сўнгги русумдаги автомобилгача чиқиб борган инсон зеҳни футболни писта пўчоқдек чақиб ташлаган бўларди.

Хўш, нима бўпти? Энди нима бўлади? “Пенсионерлар”нинг (кеча “чоллар” деганимда нотўғри тушунганлар ҳам бўлди, аслида клубнинг лақабларидан бири – “пенсионерлар” ҳисобланади) ғалабаси футболдаги революциями? Йўқ. Бу ерда ҳеч қандай янгилик йўқ. Атроф муҳит ўхгармади. Ўзгаришга мухтож ҳам бўлмади. Атрофга нисбатан муносабат ўзгарди. “Кубокни шу йили оламан” деб кетма-кет мураббийларни алмаштираверган Абрамович бир кечада ўзгариб қолишига ишонмайман. Аммо менимча, у шуни тушуниб етдики – йиллаб орзу қилган ва эришган бу шоҳсупа, аслида, ҳеч кутилмаган томондан тақдим этилиши мумкин экан. Морал шундаки, ундай кубоклар илгари орзу қилганидек, оламшумул мукофот ҳам эмас экан. Атроф “Челси”ни ЕЧЛ ғолиби сифатида осонлик билан қабул қила олди. Шунинг ўзи эди бу ерда мукофот. Яъни, бундай инсонлар учун асосий мақсад қандайдир совринлар эмас, кучли ва эътиборли жамоа яратиш бўлиш кераклигини тушуниб етгандир балки. Таҳмин қилиш мумкинки, энди Абрамович бошқа йўлдан боради. Узоқ муддатли лойиҳалар, катта даврга мўлжалланган ривожланиш йўлини танлайди. Кубокни ютиш эмас, кубокка лойиқ бўлган жамоа тузиш йўлидан боради. Ана шунда кубоклар ҳам ўз ўзидан келаверишини пайқагандир, энди. Бу йўлда, Ди Маттеодан воз кечилиши эҳтимолга жуда яқин. У бу мавсум ажойиб ишлади, уялтирмади, кутилганидан зиёда натижа келтирди. Аммо унинг ушбу мавсумда бажарган иши билан келаси мавсумда “Челси” мураббийидан талаб қилинадиган ишлар ўртасида жуда катта фарқ бор. Кейинги вазифани Ди Маттео қай тарзда уддалаши эса, худди ўша қишда, жамоа “Наполи” дарвозасига тўртта гол уришни уддасидан чиқа олармиди, деган саволдаги каби мавҳум. Абрамович эса, таваккал қилишни истамаса керак. 

“Челси тажрибаси” эса, бизга яна футболни эслатди. “Челси” ғалабаси бизга икки йил кетма-кет ҳеч ким кубокни ютиб ололмайдиган бу ажойиб мусобақанинг даражасини юқорироқ кўтарди. Ёз бўйи, у буёққа ўтармиш, бу уёққа қайтармиш, қабилидаги ҳар қанча янгиликлар эшитмайлик, келаси май ойининг пардасини кўтара олмаслигимизни тушуниб етдик. Моуриньо “келаси мавсумда “Реал” ярим куч билан ҳам кубокни ўзиники қилиб олади” деб юборганида, биз енгилгина кулиб қўя қолдик...

Киритилган сана: 21.05.2012 17:10. Ўкилди: 7170 марта.

Фикр билдиринг

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

Билдирилган фикрлар:


AZIZI
Сана: 25.05.2012 13:28. AZIZIга ёзиш
+0; -0
яхши

Ушбу фикрга жавобан

AZIZI
Сана: 25.05.2012 13:28. AZIZIга ёзиш
+0; -0
яхши

Ушбу фикрга жавобан

IBRAKADABRA
Сана: 24.05.2012 16:51. IBRAKADABRAга ёзиш
+0; -0
Челсини ЧЛ да голиб чикиши худди Германия терма жамоасини жахон чемпиони булишига ухшаб кетди. Финалдан олдин кайси жамоа голиб чикишини тахмин килмагандим. Лекин уйин пенальтилар сериясигача боришини негадир кунглим сезганди. Лотореяда эса омад Челсига кулиб бокди. Менимча хаммаси оддий. Агар Бавария ютганида хам футбол оламида ва Абрамович хаелида хеч нарса узгармаган булар эди. Нари борса Бавария хакида тахлилий макола езилар эди. МС,ПСЖ ва Малагалар хам пулларни сарфлаб-сарфлаб вакти келса баркарор бир клубга айланиб колишар. Ахир улар хам хозирги даврда клуб брендини яратишяпти.

Ушбу фикрга жавобан

MAURINHOMI
Сана: 22.05.2012 14:40. MAURINHOMIга ёзиш
+0; -0

Ушбу фикрга жавобан

MAURINHOMI
Сана: 22.05.2012 11:10. MAURINHOMIга ёзиш
+0; -0
Fikrimcha Chelsini g`alabasi bu futbolni g`alabasi bo`ldi. Mavsumni ideal darajada o`tkazgan barsa yoki realdan ko`ra aynan chelsini yevropada tengsiz bo`lgani sportning futbol turiga bo`lgan qiziqishni yanayam oshirib yuboradi. bu chelseani shahsan man abramovich kelgandan beri yaratgan eng kuchli tarkibi deya olmayman... lekin jamoa ming marta shu kubokka haqli edi. usha Mour paytidayam, grant paytidayam, anchelotti va eng asosiysi Hiddink paytidayam jamoa bu kubokka munosib nomzod bo`lgan bir paytda shu nimadur yetishmasdi eng muhim pallada... liver b-n o`yinda Luis garsiya tomonidan kiritilinmagan golning hisoblanishi, kelasi yildagisida esa Dahshatli barsa bilan 1/8 da ko`rishish, kelasi yili Liver b-n o`yinda robben va lampard tomonidan amalga oshirilmagan penaltilar, evrebe... hullas yoki bu yil yoki hech qachon edi. Drogba lampard, terry, cheh cole essienlar uchun endi yana shunday imkon bulish ehtimoli bor bo`lsada ishonish qiyin bo`lgan haqiqatlardan biri hisoblanishini anglab turipmiz. shunday ekan barcha futbol muhlislarini chelsi YeChL ni qo`lga kiritgani bilan ttabriklayman... ishoning bu futbolning g`aalabasi !

Ушбу фикрга жавобан

USMONALI
Сана: 22.05.2012 08:50. USMONALIга ёзиш
+0; -0
shuni aytadilarda yugirgannikmas, buyurganniki deb. Muhlislarni 80% real bilan barsaga ovoz berishgan ekan.bavariyadga 13%.chelsiga 7%. Taqdirni qaranki hechkim kutmagan chelsi g'olib chiqdi.anu turdan turgacha ko'rsatuvidagilarga saboq bo'ldi deb o'ylayman.olloh ham bandasiga sendan harakat mendan barakat degan.lekin bandasi o'zidan ketib bu so'zlarni inkor ham qilib qo'yishadi.yana bittasi men palonchidan zo'rman deb chiqibdi vaholanki ertaga nima bo'lishini uni o'zi ham bilmaydi.

Ушбу фикрга жавобан

STRATEGUZ
Сана: 22.05.2012 00:09. STRATEGUZга ёзиш
+0; -0
Маколада келтирилган фикрлар, айни хакикат. Буни инкор этиб булмайди. Челсини ашадий мухлиси сифатида Herolion табрикларимни кабул килинг!!!

Ушбу фикрга жавобан

NINODADAXON
Сана: 21.05.2012 23:03. NINODADAXONга ёзиш
+0; -0
aka maqolaga gap yoq

Ушбу фикрга жавобан

MUNIS
Сана: 21.05.2012 22:48. MUNISга ёзиш
+0; -0
зур ёзилган макола кутганингданда аьло ёзилса кушимча фикрлар келмаскан навбатдаги шедевр и всё!

Ушбу фикрга жавобан

RAHIMBERDI
Сана: 21.05.2012 21:37. RAHIMBERDIга ёзиш
+0; -0
Qaroqchi chollar sarlavhaga gap yo'q, etirozlar negadir tushunarsiz, o'yinni ko'rolmay saytga kirganlar ham bu sarlavhadan Chelsi yutganini bilishdi)) Real (B) avariyadan omon chiqmadidan bo'ldi)

Ушбу фикрга жавобан

RAHIMBERDI
Сана: 21.05.2012 21:31. RAHIMBERDIга ёзиш
+0; -0

Ушбу фикрга жавобан

RAHIMBERDI
Сана: 21.05.2012 21:31. RAHIMBERDIга ёзиш
+0; -0
Bale Qahramon Aslanov mening akam, men o'zi yolg'iz farzandman shuning uchun ismim Rahimberdi. Lekin bu kishi mening rodnoy akam.

Ушбу фикрга жавобан

METALLURG
Сана: 21.05.2012 20:47. METALLURGга ёзиш
+0; -0
"Бунёдкор" ҳам бу йил ОЧЛни олиб қолсайди)))

Ушбу фикрга жавобан

GAYRATBEK
Сана: 21.05.2012 20:02. GAYRATBEKга ёзиш
+0; -0
Konferensiyagizda aynan shunday maqola yozishingizni so'ragandim. Rahmat sizga

Ушбу фикрга жавобан

SERENADA
Сана: 21.05.2012 18:46. SERENADAга ёзиш
+1; -0
Афсус, афсус. Шундай ажойиб маколалар аудиторияси жудда кам булган сайтда чикаётгани мени ташвишлантираяпти. Давлатимиздаги ун минглаб укйвчилари булган ва мунтазам, хафтасига икки марта чикиб турадиган футбол газетасиниям безайдиган бундай юкори саъвияли маколаларни атига юэтача укувчи укияпти холос. Биласизларми мен К Аслановни мухлислари жуда кам жамоада(Шуртан, Машъал, Локомотивлар каби) жуда зур уйнаётган футболчига ухшатаяпман. Асланов илтимос бундай шедевр маколаларингизни бирор газетагаям беринг. Сайтга кирмайдиган минг-минглаб мухлислар хам бу маколаларингиздан бахраманд булсин.

Ушбу фикрга жавобан

AZIZBECKS
Сана: 21.05.2012 18:45. AZIZBECKSга ёзиш
+0; -0
Biza shunichunam futbolli shunchali yaxshi ko'ramiz!

Ушбу фикрга жавобан

JAMSHIDJON
Сана: 21.05.2012 17:59. JAMSHIDJONга ёзиш
+0; -0
Zur va yana zur

Ушбу фикрга жавобан

ABOMUSLIM
Сана: 21.05.2012 17:43. ABOMUSLIMга ёзиш
+0; -0
Зўр мақола гап йўқ!

Ушбу фикрга жавобан

МУАЛЛИФНИНГ БОШҚА МАҚОЛАЛАРИ

 

БЛОГГЕРЛАР

Асосий сахифа
© STADION.UZ
Гувоҳнома №0917. Берилган санаси: 02.12.2013. Муассис: «OSIYO KABEL» МЧЖ. Бош муҳаррир: Бўронов Олимхўжа Азимхўжа ўғли. Таҳририят манзили: 100057, Тошкент шаҳри, Уста Ширин 125. E-mail: admin@stadion.uz
Барча ҳуқуқлар ҳимояланган. Сайт материалларидан тўлиқ ёки қисман фойдаланилганда веб-сайт манзили кўрсатилиши шарт.
Блогдаги материаллар учун блог эгаси, хабарлар остидаги фикрлар учун фойдаланувчининг ўзи жавобгар.